الإنخراط في مؤسسة محمد السادس والصندوق الوطني لمنظمات الاحتياط الاجتماعي CNOPS

أعزائي الكرام، أعزاءاتي الكرامات 😂
هاد الدرس خاص بالناس للي كيسولو على مؤسسة محمد السادس وكنوبس. 🗃

1. مؤسسة محمد السادس للنهوض بالأعمال الاجتماعية للتربية والتكوين: 6⃣

تأسست سنة2001 ف إطار تحفيزالموارد البشرية وداكشي.

** آشنو كدير هاد المؤسسة؟ 🤔
هادي آسيادنا كتقدم مجموعو من الخدمات مثل:
– التغطية الصحية التكميلية، كيفاش؟🤔 دابا التأمين الاجباري عن المرض كاين عند كنوبس ولكن ما كيغطيش جميع الأمراض، هادشي علاش جات التغطية التكميلية باش تكمل داكشي للي ناقص كنوبس بحال: مصاريف العمليات الجراحية،👨🏻‍⚕ الحوادث الخطيرة، التحليلات الطبية والترويض الطبي. 🤒

قروض السكن بفائدة منخفضة: 2.5% 🏡
التخفيض من تذاكر تران بنسبة 40% 🚅
الانترنت adsl وشراء بيسي pc 💻
مراكز الاصطياف ….. 🏝

ضرب شي طليلة على الموقع ديالهم 🌐 www.fm6education.ma
** كيفاش ننخرط بيها؟ 🤔
الانخراط يتم بشكل تلقائي، يعني غير كتخدم كيبداو يقتطعو لك واحد 70 درهم سنويا (السلم 10). 💷
ولكن باش تستافد من الخدمات خاصك ضروري تسجل عندهم وتحصل على بطاقة الانخراط. 💳 ايوا شتييييييي دابا !! 😎ملي يبغيو يقتطعو مايتشاوروش معك وملي تبغي تستافد سير جيب لينا هادشي:📝
كاين جوج وريقات خاص تعمرهم (استمارة طلب الانخراط وطلب الحصول على بطاقة الانخراط) 📝 ها هما حطيناهم لتحت 👇 للتحميل، و تزيد عليهم صورة لاكارط ناسيونال، وشهادة العمل، وايلا كانو عند شي وليدات خاصك تزيد عقد الزواج وعقود الازدياد ديال دراري وظرف متنبر.
كتاخذ هاد الوثائق لفرع المؤسسة ف مدينتك ولا كترسلهم عبر البريد وتهنى 📬 ( العنوان كاين ف استمارة الحصول على بطاقة الانخراط)

2. كنوبس 🗃

كنوبس كتعني الصندوق الوطني لمنظمات الاحتياط الاجتماعي وفيه 8 تعاضديات (الأمن الوطني، الجمارك، القوات المساعدة، البريد والمواصلات، الإدارات والمصالح العمومية، استغلال الموانئ، موظفي الإدارات العمومية، التعاضدية العامة للتربية الوطنية)، للي كتهمنا حنا هي ديال التربية الوطنية،🏛 وللي كيهنا أكثر هو التأمين الاجباري عن المرض. 🤒
** شكون كيستافد من هاد التامين؟ 🤔
هاد التأمين كيستافد منو الموظف👨🏻‍🏫،الزوج(ة)، دراري للي عندهم أقل من 21 سنة (أو 26 سنة ايلا كانو يتابعون دراسات عليا) 👨🏻‍🎓، دراري المتكفل بهم بشكل قانوني، الأطفال المعاقون جسديا أو ذهنيا، ومشروع انخراط الوالدين مزال قيد الدراسة.
** كيفاش ننخرط فيه؟ 🤔 الانخراط حتى هو تلقائي وتا هو بلا مايتشاورو معك كيقتاطعو لك 147.5 درهم شهريا.
ولكن باش تستافد خاصك بطاقة الانخراط. 💳
إيوا كيفاش نحصل على هاد البطاقة؟ 🤔

كاينة استمارة الانخراط 📝 تعمروها وتوقعو فيها نتوما ومدير المؤسسة للي خدامين فيها (ها ليان ديال التحميل حطيناه لتحت👇 )
4 صور
شهادةالأجرة attestation de salaire
2 صور لاكارط ناسيونال cin
شهادةالتعريف البنكي (RIB) أو شيك ملغى.

وإيلا كانو عندك زوج(ة) ودراري، خاصك تزيد شي وثائق (ها هما كاينين مع الاستمارة لتحت).

– من بعد كتاخذ هاد الوثائق لفرع التعاضدية الموجود ف جهتك (لتحت كاينين عناوين جميع الممثليات الجهوية 👇).

** شحال كترجع ليك التعاضدية من مصاريف العلاج ؟ 🤔

بالنسبة للخدمات المضمونة كتراوح نسبة التعويض بين 80% و 100% من مصاريف العلاج، وهاد الخدمات فيها بزاف بحال: الاستشارة الطبية والجراحية – الكشوفات الاشعاعية -التحاليل – المصاريف الخاصة بالأسنان – مصاريف النظارات – مصاريف الأجهزة الطبية ومصاريف الترويض الطبي – تصفية الدم …..

** كيفاش نسترجع هاد المصاريف؟ 🤔

من بعد العلاج خاص تعمر واح الورقة سميتها ورقة العلاجات المتعلقة بالمرض(حملها من لتحت 👇ولا تلقاها عند المكتبة)، ويوقع فيها الطبيب المعالج 👨🏻‍⚕ ومول الصيدلية وتعطيها للتعاضدية ومن بعد غادين يردو ليك المصاريف ف لحساب ديالك (كياخذوه من RIB). 💷💷